Бе убо некто человек млад верстою именем Меркурий во граде Смоленске. Благочестив сый. В заповедех господних поучаяся день и нощь, цветый преподобным житием. Постом и молитвою сияя бо, яко звезда богоявленна посреде всего мира. Бяше бо умилен душею и слезен. Часто прихождаше ко кресту господню молитися за мир. Зовомый Петровскаго ста.
      Бе бо тогда злочестивый царь Батый пленил Рускую землю, безвинную кровь пролия, аки воду сильну, и християн умучи. И пришед той царь с великою ратию на богоспасаемый град Смоленск, и ста от града за 30 поприщ, и многи святыя церкви пожже и християн поби и твердо вооружашеся на град той.
      Людие же бяху в велицей скорбе, неисходно пребывающе в соборной церкви пречистыя богородицы; умильно вопиюще с плачем великим и со многими слезами ко всемогущему богу и пречистей его богоматере и ко всем святым, еже сохранитися граду тому от всякого зла.
      Се же бысть некое смотрение божие ко гражаном. Вне града бысть близ за Непр рекою в Печерстем монастыри преславно явися пречистая богородица понамарю тоя церкви и рече: "О человече божий, скоро изыди ко оному кресту, идеже молится угодник мой Меркурий, и рцы ему: "Зовет тя божия мати". Он же шед тамо и обрете его у креста молящася богови и возва его именем: "Меркурие!" Он же рече: "Что ти есть, господине мой!" И глагола ему: "Иди скоро, брате, зовет тя божия мати в печерскую церковь".
      Паки же вшед богомудрый во святую церковь и виде пречистую богородицу на злате престоле седяща, Христа в недрех имуща, обстоима ангельскими вои. Ои же, паде пред ногама ея, поклонися с великим умилением, ужасен бысть. Востави его от земля пречистая мати божия и рече ему: "Чадо Меркурие, избранниче мой, посылаю тя, иди скоро сотвори отмщение крови християнская. Шед победи злочестиваго царя Батыя все войско его. Потом приидет ти человек, красен лицем, вдай же ему в руце все оружие свое, и усечет ти главу. Ты же ю возьми в руку свою и прииди во свой град, и тамо приимеши кончину, и положено будет твое тело в моей церкви". Он же зело о том востужи и восплака и глагола: "О пресвятая госпоже владычице, мати Христа бога нашего, како аз окаянный и худый, непотребный раб твой, на толикое дело твое силен быти? И не достало ли ти небесныя силы, владычице, победити злочестиваго царя!" И взем благословение от нея, и весь вооружен бысть, и отъиде, поклонився до земля, и изыде из церкви. И обрете ту прехрабра коня стояща, и воссед нань, и исшед из града. И, дошед полки злочестиваго царя, божиею помощию и пречистыя богородицы побивая враги, собирая християн пленных и отпущая во град свой, прехрабро скакаше по полком, яко орел по воздуху летая.
      Злочестивый царь, ведев таково побеждение людей своих, велиим страхом и ужасом одержим бысть и скоро отбежа града того без успеха в мале дружине. И пришед во Угры, и тамо злочестивый Стефаном царем убиен бысть.
      Таже предста Меркурию прекрасен воин. Он же поклонися ему и вда все оружие свое и преклонь главу свою, и усечен бысть. И тако блаженный взем главу свою в руку свою, а в другую руку коня своего, и пришед во град свой безглавен. Людие же, видевше тако, удивляющеся божию строению. И дошед врат Мологинских, ту же вышла по воду некая девица и зря святаго без главы идуща и начат святаго нелепо бранити. Он же в тех вратех возлеже и предаст честне душю свою господеви. Конь же той не видим бысть от него.
      Того же града архиепископ пришед со кресты со множеством народа, хотя взяти честное тело святаго. И не вдася им святый. Тогда бысть велий плач в людях и рыдание, что не восхоте поднятися святый. Таже бысть архиепископ в велице недоумении, моляся богови о том. И се тлас бысть к нему, глаголя: "О слуго господень, о сем не скорби: кто посла на победу, той и погребет его". Святому же ту лежащу 3 дни непогребенну. Архиепископ же той всю нощь без сна пребываше, моляся богови, да явит ему бог тайну сию. И зря во оконце свое опасно прямо соборныя церкве. Се же видит ясно в велицей светлости, аки в солнечной зари, исшедши ис церкви пречистая богородице со архистратиги гооподни Михаилом и Гавриилом. И дошедше места того, идеже лежаше тело святаго, взем же пречистая богородица в полу свою честно тело святаго и принесше во свою соборную церковь и положи на месте своем во гробе, идеже есть и до ныне всем видим бысть, содевая чюдеса в славу Христу богу нашему, благоухая яко кипарис.
      Архиепископ же ко утренней вшед в церковь, виде чюдо преславно - святаго лежаща на своем месте почивающа. Таже стакшеся людие и видивше чюдо то и прославиша бога.



   назад       далее