(Слово Святого Преподобного Сирапиона)

      Почюдим братие, человеколюбье бога нашего. Како ны приводит к себе? кыми ли словесы не наказаеть нас? кыми ли запрещении не запрети нам? Мы же никакоже к нему обратихомся. Видев наша беззаконья умножившася, видев ны заповеди его отвереша, много знамении показав, много страха пущаще, много рабы своими учаше, и ничим же унше показахомься. Тогда наведе на ны язык немилостив, язык лют, язык не щадяшь красы уны, немощи старець, младости детии; двигнухомь бо на ся ярость бога нашего: по Давиду, вскоре взгорися ярость его на ны. Разрушены божественныя церкви; осквернени быша его на ны. Разрушены божественныя церкви; осквернени быша ссуди священии; потоптана быша святая; святители мечю во ядь быша; плоти преподобных мних птицам на снедь повержени быша; кровь и отец и братия нашея, аки вода многа, землю напои; князии наших воевод крепость ищезе; храбрии наша страха напольншеся, бежаша; мьножайша же братия и чада наша в плен ведени быша; села наша лядиною поростоша, и величьство наша смерися; красота наша погыбе; богатство наше онемь в користь бысть; труд нашь погании наследоваша; земля наша иноплеменикомь в достояние бысть; в поношение быхомь живущиим вскраи земля нашея; в посмех быхом врагом нашим, ибо сведохом собе, акы дождь с небеси, гнев господень; подвигохомь ярость его на ся и отвратихом велию его милость; и не дахом призирати на ся милосердныма очима. Не бысть казни, кая бы преминула нас; и ныне беспретани казними есмы; не обратихомся к господу; не покаяхомся о безаконии наших, не отступихом злых обычаи наших, не оцестихомся калу греховнаго, забыхом казни страшныя на всю землю нашу; мали оставши велице творимся. Тем же не престают злая мучаще ны: завесть оумножилася, злоба преможе ны, величанье взнесе ум наш, ненависть на другы вселися в сердца наша, несытовьство именья поработи ны, не дасть миловати ны сирот, не дасть знати человечечьскаго естества; но, акы зверье жадають насытитися плоти, тако и мы жадаем и не престанем, абы всех погубити, а горкое то именье и кровавое к собе пограбити; зверье едше насыщаются, мы же насытитися не можем, того добывше, другаго желаем. За праведное богатьство бог на гневается на нас, но, еже речено пророкм, с небеси призри господь видети, аще есть, кто разумева или взискаяи бога, вси уклонишася вкупе, и прочее. Ни ли разумевають все творящи безаконье, снедающе люди моя в хлеба место? Апостол же Павел беспрестани впиеть, глаголя: "братие, не прикасаитеся делех злых и темных, ибо лихоимци грабители со идолослужители осудяться". Моисееви что рече бог: "аще злобою озлобите вдовицю и сироту, взопьють ко мне, слухом услышю вопль их, и разгневаюся яростью, погублю вы мечем". И ныне збысться о нас реченое: не от меча ли падохом? не единою ли, ни двожды? что же подобает нам творити, да злая престануть, яже томят ны? Помяните честно написано в божественых книгах, еже самого владыкы нашего большая заповедь, еже любити друг друга, еже милость любити ко всякому человеку, еже любити ближняго своего аки себе, еже тело чисто зблюсти, а не осквернено будеть блюдом; аще ли оскверниши, то очисти е покаяниемь; еже не высокомыслити, ни вздати зла противу злу ничего же. Тако ненавидить господь бог наш, яко злу помятива человека. Како речем: отче наш, остави нам грехи наша, а сами не ставляюще? В ню же бо, рече, меру мерите, отмерит вы ся. Богу нашему.



   назад       далее